MUSIK & TEXTE

Einige Kostproben aus dem vielfältigen KLABES Repertoire.
„Flönz“ sogar in bewegten Bildern. Weitere Videos sind in Planung.
Außerdem sind für die Interessierten die Texte unter den Songs zu finden. (Das jeweils fett Gedruckte sind die Refrains)

Viel Spaß!

„FLÖNZ“

Die Ode an eine kölsche Spezialität!

Ich ben in Köln jebore, janz in der Nöh vum Rhing,
un kunt us mingem Finster vum Dom de Spetze sin,
ich han doheim jesesse un kölsche Wööt jelihrt,
met Leeder vun de Höhner un de Bläck Fööss afjefiert.

Et hät alles nix jenötz, selvs dä Jeißbock op d´r Mötz,
denn ich krijje et nit hin ne echte kölsche Jung zo sin,
Et wor alles ömesöns, denn bes hück….maach ich kein Flönz,

Ich han se en d´r Pann jebrode, en Öl un Essich enjelaat,
met Rohm se opjeschlage, als Dessert parat jemaat,
met Kies se övverbacke, als Spajettizaus serveet,
en Stängelche jeschnedde un en Frittefett friteet.

Et hät alles nix jenötz, selvs dä Jeißbock op d´r Mötz,…

Ich han se enjefrore, wat zovill es, es zovill,
ich krät se nit jebesse, et wor jetz Flönz am Still,
dä Draum es opjejovve, ne echte kölsche Jung zo sinn,
dröm steckt üch ühre Flönz do, wo ehr hinwollt hin.

Et hät alles nix jenötz, selvs dä Jeißbock op d´r Mötz,…

Flönz, Flönz, Flönz, ich maach kein Flönz….Flönz nit för ömesönz..
Flönz, Flönz, Flönz, ich maach kein Flönz….Flönz nit ens ömesönz..

Et hät alles nix jenötz, selvs dä Jeißbock op d´r Mötz,…

Doch wann ihr wollt, wann ihr wollt, wann ihr wollt,
doot drüvver laache
….denn för Blootwoosch künnt ich mich vermaache


„In d´r JENOSSESCHAFF“

Do mäs de Dür op, jeis eren, un plötzlich steis do medden dren,
En dem kleine Jlöck, wat sich dinge Wonnung nennt,
Do kenns ding Veedel, dinge Stroß, all die Minsche he em Huus,
en dem mer Dich allt lang, als jode Nohber kennt,
För de Frau Schmitz vun nevvenan, nemms do jähn e Päckche an,
Jeis för de ahle Webers bovven ens mim Hungk,
Un bruch et Tina ens en Ei, jo dann jiß do ihr allt zwei,
denn joode Nohberschaff, die brengste op dr Punkt.

En dr Jenosseschaff, jeit zwar de Poß nit aff,
doch wellste ruhich un secher wonne, bes do he nit in de Bunne,
Bei ner Meet, die mer sich noch leiste kann,
en dr Jenosseschaff do bes do jlöcklich dran.

Do bes zick Johre Mitjlied he, dat wor en wunderbar Idee,
domols vun dr Mamm, he Jeld zo envestiere,
Zickdem bes do he Zehuus, bruchs nit mih us dr Wonnung russ,
Doch su jet muss dr Minsch zoeesch ens lihre,
Un weed de Heizung ens nit wärm, nimp Dich he keiner op de Ärm,
Do bruchs nor ahnzerofe un et weed jemaat,
Plötzlich schellt et an d´r Dür, steiht he ald do d´r Herr Monteur,
un do häss noch nit ens zwei Daach drop jewaat.

En d´r Jenosseschaff….

Wie ein Familich steit mer do, un dem de entreck weed schnell klor,
dat en dem Lade Freud un Leid, janz eng zesamme steit.
Weed dr Frau Meyer et zovill, klopp die flöck mem Besemstill,
an de Deck, weil bovve einer zo scheef singe deit,
Kütt drette Stock e Kind zur Welt, weed unge dä Pastor bestellt,
määt de Frau Jroß em Ädjeschoss ehr Auge zo.
Dun sich de Müllers morje trenne, un zom Scheidungsanwalt renne,
trick en dä Wunnung nevvenan dr Huusfründ en.

En d´r Jenosseschaff….

Doch op eins dun die em Büro Wäät drop läje,
dat mer et Huus, dä Hoff un och dä Keller fäje,
weed dat verjesse, heis et flöck “die ahle Wutz”
dä hätt ald widder nit et Treppehuus jeputz….

En d´r Jenosseschaff….


„SPASS JÄJE HASS“

Die jolde Medde, leeve Jung, die dun niemols verloße,
do jon se dann un schmieße Stein en unsere kölsche Stroße,
fies schwade dun se all ejal, ov Rächte oder Linke,
un alles wat weed radikal, dat deit zum Himmel stinke.

Mer maache Spass jäje dä Hass,
dun leever baue, als uns zo verhaue,
mer maache Freud uns zo jeder Zick,
mer losse Metminsche nit us em Bleck

Ov Pro und Contra fremde Lück, sollst do nit üvverdrieve,
ich rode Dir bei däm Verzäll, stets brav und sachlich blieve,
et jitt för op dä Hot zu haue doch kein schöner Saache,
däm fiese Mopp de Zäng ze zeige, als met unserem Laache.

Mer maache Spass…

Met „Jott es jroß“ weet randaleet, dat es nit zo verdrage,
do wäde Minsche schikaneet, met Knöppele jeschlage
,em Name vun ner Religion, leet manche Minsch sing Bloot,
nu froch ich üch bei all däm Kreech, wat für ne Jott fingk su jet jot?

Mer maache Spass….


„FAS ENS ZICK“

Mer han jesunge, jedanz un jelaach,
han uns ene schöne Fastelovend jemaat,
all die jecke Jecke, d´r Zoch esu bunt,
dausend Bützjer op d´r Mund,
Doch eines dat es klor,
su kann et nit blieve dat janze Johr

Jetz weed et fass ens Zick
sich op sich zo besenne
Jo, jetz weed et fass ens Zick
sich selves ens widder ähnz zo nemme
sin mer Kölsche och jeck op Karnevel
aff Äschermettwoch sin mer widder all normal
Alles hät sing Zick, wat e Jlöck

Un han mer dä Winter endlich usjedrieve,
lieje am Strand en d´r Hollywoodlieje,
40 Jraad em Schatte wat en Temperatur,
wat määt dat blöde Termometer dann nor,
dann weed uns eines klor
su kann et nit blieve dat janze Johr

Jetz weed et fass ens Zick…

Eh de dich versühs es et widder Advent
han ich dann et janze Johr verpennt,
ald widder sin övverall schon Lämpcher ahn,
ich weiß, dat ich noch nit alle Jeschenke han,
doch eines dat es klor,
su kann et nit blieve dat janze Johr…

Jetz weed et fass ens Zick
sich op sich zo besenne
jo, jetz weed et fass ens Zick
sich selves ens widder ähnz zo nemme
jetz weed et fass ens Zick
op de decke Trumm ze schlare,
jetz weed et fass ens Zick
en d´r Weetschaff affzeja

denn mer Kölsche sin jeck op Karneval,
an Fastelovend sin mer widder all normal,
alles hät sing Zick, wat e Jlöck


„SCHMACHTEFON“

Ich jevve jo zo, ich hat jet jedrunke,
doröm ben ich op Heim ahn, en dr Schlof jesunke.
Dat he Endstation es, wood noch sicher jeroofe.
Doch dat han ich nit jehoot, do wor ich jo am schloofe.
Die Bahn wor zo, et Leech wor us, un ich ben waach jewoode.
Et wor keiner en dr Fahrzeughall, dat kuntet ehr üch roode.
Dat einzije en d,r Täsch, dat wor et Schmachtefon,
met winnijer als 2% beim nöchste Klingelton.

Jank doch bitte, bitte ahn et Telefon dran, oder
dun mer ne Jefalle un roof mich ens ahn,
ich weede he janz sicherlich noch raderdoll,
ald widder es, ald widder es dinge Mählbox voll

Ich wor am renoveere, wat sin muss dat muss sin.
Dröm ging ich op dr Leider, tirek noh bovve hin,
En Deckelamp wor affzeschruve, dat wor minge Job.
Op einmol jov ene Knall die Leider, die wor fott.
Met einer Hand kunnt ich noch ahn de Strippe packe,
doch die Deck wor ziemlich huh, un dat wor echte Dress,
et Schmachtefon wor en d`r Botz, un dat wor mie Jlöck,
et Huus wor leer, die Pänz all fott, ming Frau wor op Jöck.

Jank doch bitte, bitte ahn…

Op Kressdääch han ich dat Problem, wat jede Kääl kennt,
dat mer op dr letzte Deu eetz zom Enkaufe rennt.
Jetz hat ich dat Jlöck, dat ich dä Hätzenwonsch fund,
un met däm pinke Ponny ahn Kass ahnstund.
Doch keine Grosche en d’r Täsch, mie Jeld dat loch Zohuss,
un dat, ich soch et op d’r Uhr, koot för Ladeschluss!
Et Schmachtefon för metzenemme hat ich nit verpennt,
ich soch et alt om Display, under 2%….

Jank doch bitte, bitte ahn et Telefon dran, oder
dun mer ne Jefalle un roof mich ens ahn,
ich weede he janz sicherlich noch raderdoll,
ald widder es, ald widder es dinge Mählbox voll,


ich krije he noch jet ahn et Hätz, ald widder es bei dir besetz!


„JRÖNE DUME“

Minge Jade hät vielleich su 50 Meter em Quadrat,
doch för jet dren zo dun, do hatt ich vill zo lang jewat.
Dä Dschungel vun janz Kölle litt jetz hinger mingem Huus,
ich kumme allt sick Woche nit zor Jadepootz erus.

Em Huus do kann mer üvver Daach met ohne Lamp nix sin,
denn durch de Finster fällt em Sommer jar kei Leech eren,
bes ahn d´r eetste Stock eran es alles zo jewahße,
dat janze Jröns un och dä Bösch han ich op d´r Terrasse.

Jetz weed et langsam Zick, dat mich jet noh drusse trick.

Mer fählt dä jröne Dume, ich kann maache wat ich well,
manchmal jeeße ich zo winnich, manchmol jeeße ich zovill,
ich krieje Büüle ahn de Finger wann ich nor ne Spaate sinn,
doröm leet mich och ming Frau nit mieh en d´r Jaade ren.

Sei kumme och vun Wuppertal un Jläbbisch ald he hin,
öm su en Stöck vun unberührt Natur ens ahnzosinn,
ahnjeblich han se en d´r Stroß e Plänzje fassjestellt,
dat jitt et nor ahn mingem Huus, söns nirjens op d´r Welt.

Dröm eetz ens affjewaat, bevür mer jet verkeet jemaat.

Mer fählt dä jröne Dume,…

Ming Döchterche setz ahn d´r Huusdüür, ahn d´r Entrettskass,
Minge Jung määt Führunge, denn dat määt ihm Spass,
ming Frau verkööf Jetränke un och Woosch he ahn de Lück,
nor einer dä hät nix zo dun, en d´r janze Zick.

Dröm lääje ich mich zoröck, un jeneeße ens die Zick…

Mer fählt dä jröne Dume,…

Dä Keukenhof hätt zo jemaat, wä well noch Tulpe sin,
statt desse kütt d´r Holländer met Busse jetz he hin,
Dröm drink ich ´ne Schabau, denn wä fuul es, es och schlau…

Mer fählt dä jröne Dume,…


„STINA“

Et wor op Fastelovend, ich hat jrad Fierovend,
do ging ich en de Weetschaff op dr Eck,
do nohm ich mer e Bier un e Röggelche met Kies,
un wie ich su do soß un ming Brüdche jrad jeneeß,
do steiht et op einmol en dr Dür,
un ich, ich fing tireck öntlich För

Et wor e su lang Stina un ich, ich fand dat prima,
un nohm en mingem Suff, dat lange Stina met noh Huus,
denn Fastelovend ben ich för nix fies,
dröm nohm ich mer dat klapperije Bies,
un hück weiß ich ald nit mieh, wie dat lange Stina heeß.

Et wor am Äschermettwoch, als ich en de Kaschämm kroch,
do soß do su ene Kääl, dä luurte ald esu schääl,
dat wor dä Kääl vum Stina, dat leef nit esu prima,
Mensch, hät ich dat jewoß, nöhm ich dat Bies nit met noh Huus,
jetz steiht dä op einmol vür mir, un ich, ich kunnt doch janix dofür.

Et wor e su lang Stina un ich…


„LEED FÖR DICH“

D´r Schlüssel stich em Zündschloss un ich setz en mingem Waare,
en Jedanke ald em Büro, doch ich wollt Dir noch jet saare,
bess jraad noch han mer zwei su schön am Fröhstücksdesch jesesse,

doch dat Wichtigste vum Daach, dat han ich bahl verjesse

Kumm ens bei mich bei minge Sööße, ich verzäll d´r ens jet us em Blösje,
Do weiss doch wat mer Kölsche nit saare künne,
fass esu ald däte mer uns de Schnüss verbrenne,
wat all die schwölztije (Ch)Julios singe,
kann ne Kölsche nit övver der Leppe brenge,
doch bei Sunnesching und Rään, saach ich Dir ihwich ich han Dich jään,
un övverhaupt un ahn för sich, schläät mi(ng) Hätz, mi Hätz nor för Dich.

Mer han noch vill zo laache, och noh all dä lange Johre,
un mer kennt sich niemols janz, hätt och noch su manche Frore,
doch mer künne stundelang stell zesamme jonn,
weil mer uns ald em Levve och ohne Wööt verstonn…

Kumm ens bei…

Em Kopp do kann sich jede Kääl su manch Luffschlössje baue,
un em Draum do süht hä sich dann stonn, nevve schönste Modellfraue,
doch de Wohrheit zo erkenne, muss ich mich nit lang besenne,
denn schöner wie do bess, hätt ich Dich nit dräume künne.

Kumm ens bei…

För Dich do dät ich nor em Hoot, övver de Huhstrooß renne,
em deefste Winter en nem Stall bei Ochs un Essel penne,
för Dich wööd ich Prinz Karneval em Himalaya wääde,
un met Dir zesamme han ich ald dä Himmel he op Äde.
Doch einz dat schlaach d´r us em Kopp, dat dun ich nit zom verrecke,

och met Dir zesamme dät ich n i e …………noh Düsseldorf ömtrecke……

Kumm ens bei…